ಕಾಮ

 ಅರಿಷಡ್ವರ್ಗಗಳಲ್ಲಿ ಕಾಮ 

 { ಇಚ್ಛಾಶಕ್ತಿ ಮತ್ತು ಜೀವನದ ಪ್ರೇರಕ ಶಕ್ತಿ }

ಭಾರತೀಯ ಸನಾತನ ಧರ್ಮದಲ್ಲಿ ಮನುಷ್ಯನ ಅಧಃಪತನಕ್ಕೆ ಕಾರಣವಾಗುವ ಆರು ಆಂತರಿಕ ಶತ್ರುಗಳನ್ನು 'ಅರಿಷಡ್ವರ್ಗ'ಗಳೆಂದು ಕರೆಯಲಾಗಿದೆ. ಅವುಗಳಲ್ಲಿ ಮೊದಲನೆಯದು 'ಕಾಮ'. ಸಾಮಾನ್ಯವಾಗಿ ಕಾಮವೆಂದರೆ ಕೇವಲ ಲೈಂಗಿಕ ಹಂಬಲ ಅಥವಾ ಭೋಗದ ಆಸೆ ಎಂಬ ಸಂಕುಚಿತ ಭಾವನೆಯಿದೆ. ಆದರೆ, ಶಾಸ್ತ್ರೀಯವಾಗಿ 'ಕಾಮ' ಎನ್ನುವುದು ವಿಶಾಲವಾದ ಮತ್ತು ಆಳವಾದ ಅರ್ಥವನ್ನು ಹೊಂದಿದೆ.

1. ಕಾಮ ಶಬ್ದದ ವ್ಯುತ್ಪತ್ತಿ ಮತ್ತು ಅರ್ಥ

'ಕಾಮ' ಎಂಬ ಶಬ್ದವು ಸಂಸ್ಕೃತದ 'ಕಮ್' (ಕಮು ಕಾಂತೌ) ಎಂಬ ಧಾತುವಿನಿಂದ ನಿಷ್ಪನ್ನವಾಗಿದೆ.

 ಇದರ ಅರ್ಥ 'ಇಚ್ಛಿಸು', 'ಅಪೇಕ್ಷಿಸು' ಅಥವಾ 'ಪ್ರೀತಿಸು' ಎಂದು. ಯಾವುದನ್ನು ಮನಸ್ಸು ತೀವ್ರವಾಗಿ ಹಂಬಲಿಸುತ್ತದೆಯೋ ಅಥವಾ ಯಾವುದರ ಕಡೆಗೆ ಆಕರ್ಷಿತವಾಗುತ್ತದೆಯೋ ಅದುವೇ ಕಾಮ. 

ಇದು ಮನುಷ್ಯನ ಮನಸ್ಸಿನಲ್ಲಿ ಮೂಡುವ ಮೊದಲ ಸಂಕಲ್ಪ ಅಥವಾ ಇಚ್ಛೆಯಾಗಿದೆ.

2. ಕಾಮ ಮತ್ತು ಇಚ್ಛಾಶಕ್ತಿ (Will Power)

ಕಾಮವು ಮೂಲಭೂತವಾಗಿ ಮನುಷ್ಯನ ಇಚ್ಛಾಶಕ್ತಿಯ ಒಂದು ರೂಪ. ಬೃಹದಾರಣ್ಯಕ ಉಪನಿಷತ್ತು ಹೇಳುವಂತೆ, ಮನುಷ್ಯನು ಕಾಮಮಯನಾಗಿದ್ದಾನೆ. ಅವನ ಬಯಕೆಗಳೇ ಅವನ ಇಚ್ಛಾಶಕ್ತಿಯನ್ನು  ರೂಪಿಸುತ್ತವೆ.

ಸೃಜನಾತ್ಮಕ ಇಚ್ಛಾಶಕ್ತಿ:-

ಜ್ಞಾನಾರ್ಜನೆ, ಸಮಾಜ ಸೇವೆ ಅಥವಾ ಸಾಧನೆಯ ಕಡೆಗೆ ಇರುವ ಆಸೆಯು ಮನುಷ್ಯನನ್ನು ಕ್ರಿಯಾಶೀಲನನ್ನಾಗಿಸುತ್ತದೆ. ಇದು ಧರ್ಮಬದ್ಧವಾದ ಕಾಮ.

ಅರಿಷಡ್ವರ್ಗವಾಗಿ ಕಾಮ:-

ಯಾವಾಗ ಇಚ್ಛಾಶಕ್ತಿಯು ಕೇವಲ ಕ್ಷಣಿಕ ಇಂದ್ರಿಯ ಸುಖಗಳಿಗೆ ದಾಸವಾಗುತ್ತದೆಯೋ ಮತ್ತು ವಿವೇಚನೆಯನ್ನು ಕಳೆದುಕೊಳ್ಳುತ್ತದೆಯೋ, ಆಗ ಅದು ಅರಿಷಡ್ವರ್ಗಗಳಲ್ಲಿ ಒಂದಾದ 'ದೋಷ'ವಾಗಿ ಪರಿಣಮಿಸುತ್ತದೆ.

3. ಶ್ಲೋಕಾಧಾರಗಳು

ಭಗವದ್ಗೀತೆಯಲ್ಲಿ ಶ್ರೀಕೃಷ್ಣನು ಕಾಮವನ್ನು ಮನುಷ್ಯನ ಅತಿ ದೊಡ್ಡ ವೈರಿ ಎಂದು ಕರೆದಿದ್ದಾನೆ:

ಕಾಮ ಏಷ ಕ್ರೋಧ ಏಷ ರಜೋಗುಣಸಮುದ್ಭವಃ | ಮಹಾಶನೋ ಮಹಾಪಾಪ್ಮಾ ವಿದ್ಧ್ಯೇನಮಿಹ ವೈರಿಣಮ್ || (೩.೩೭) 

ಅರ್ಥ: ರಜೋಗುಣದಿಂದ ಹುಟ್ಟಿದ ಈ ಕಾಮವೇ ಕ್ರೋಧಕ್ಕೆ ಮೂಲ. ಇದು ಎಂದಿಗೂ ತೃಪ್ತಿಯಾಗದ ಹಸಿವುಳ್ಳದ್ದು ಮತ್ತು ಮಹಾ ಪಾಪಕ್ಕೆ ಪ್ರೇರಕ. ಇದನ್ನು ಶತ್ರು ಎಂದು ತಿಳಿ.

ಕಾಮದ ಅತೃಪ್ತ ಸ್ವಭಾವ

ಬಯಕೆಗಳನ್ನು ಪೂರೈಸುವುದರಿಂದ ಅವು ಶಾಂತವಾಗುವುದಿಲ್ಲ ಎಂಬುದಕ್ಕೆ ಮನುಸ್ಮೃತಿಯ ಈ ಶ್ಲೋಕ ಸಾಕ್ಷಿ:

ನ ಜಾತು ಕಾಮಃ ಕಾಮಾನಾಮುಪಭೋಗೇನ ಶಾಮ್ಯತಿ | ಹವಿಷಾ ಕೃಷ್ಣವರ್ತ್ಮೇವ ಭೂಯ ಏವಾಭಿವರ್ಧತೇ ||

 ಅರ್ಥ: ಉರಿಯುವ ಬೆಂಕಿಗೆ ತುಪ್ಪ ಸುರಿದರೆ ಅದು ಹೇಗೆ ಮತ್ತಷ್ಟು ಪ್ರಜ್ವಲಿಸುತ್ತದೆಯೋ, ಹಾಗೆಯೇ ಆಸೆಗಳನ್ನು ಅನುಭವಿಸಿದಷ್ಟೂ ಅವು ಬೆಳೆಯುತ್ತಾ ಹೋಗುತ್ತವೆ.

4. ಕಾಮದ ರೂಪಾಂತರ: ಪತನದ ಹಾದಿ

ವಿಷಯಗಳ ಬಗ್ಗೆ ಅತಿಯಾಗಿ ಆಲೋಚಿಸುವುದರಿಂದ ಅದು ಹೇಗೆ ವಿನಾಶಕ್ಕೆ ದಾರಿ ಮಾಡಿಕೊಡುತ್ತದೆ ಎಂಬುದನ್ನು ಗೀತೆಯು ಹೀಗೆ ವಿವರಿಸುತ್ತದೆ:

ಧ್ಯಾಯತೋ ವಿಷಯಾನ್:-

ವಿಷಯಗಳ ಆಲೋಚನೆಯಿಂದ ಸಂಗ (ಅಂಟಿಕೊಳ್ಳುವಿಕೆ) ಬೆಳೆಯುತ್ತದೆ.

ಸಂಗಾತ್ ಸಂಜಾಯತೇ ಕಾಮಃ:

 ಸಂಘದಿಂದ ಕಾಮ (ತೀವ್ರ ಬಯಕೆ) ಹುಟ್ಟುತ್ತದೆ.

ಕಾಮಾತ್ ಕ್ರೋಧೋಽಭಿಜಾಯತೇ: 

ಬಯಕೆ ಈಡೇರದಿದ್ದಾಗ ಕ್ರೋಧ (ಕೋಪ) ಉಂಟಾಗುತ್ತದೆ. ಈ ಕ್ರೋಧವು ಮುಂದೆ ಸಮ್ಮೋಹ ಮತ್ತು ಸ್ಮೃತಿಭ್ರಂಶಕ್ಕೆ ಕಾರಣವಾಗಿ ಮನುಷ್ಯನ ಬುದ್ಧಿನಾಶ ಮಾಡುತ್ತದೆ.

ಕಾಮವು ಒಂದು ಶಕ್ತಿಯಿದ್ದಂತೆ. ಅದನ್ನು ನಿಗ್ರಹಿಸುವುದಕ್ಕಿಂತ ಹೆಚ್ಚಾಗಿ 'ನಿಯಂತ್ರಿಸುವುದು' ಮುಖ್ಯ. ಪುರುಷಾರ್ಥಗಳಲ್ಲಿ ಒಂದಾದ ಕಾಮವು ಧರ್ಮದ ಚೌಕಟ್ಟಿನಲ್ಲಿದ್ದಾಗ ಅದು ಜೀವನದ ಪ್ರಗತಿಗೆ ಬೇಕಾದ ಇಚ್ಛಾಶಕ್ತಿಯಾಗುತ್ತದೆ. ಆದರೆ, ಧರ್ಮದ ಮಿತಿಯನ್ನು ಮೀರಿದಾಗ ಅದು ಅರಿಷಡ್ವರ್ಗವಾಗಿ ಮನುಷ್ಯನನ್ನು ಪತನದತ್ತ ಕೊಂಡೊಯ್ಯುತ್ತದೆ. ಆದ್ದರಿಂದಲೇ ಭಗವಂತನು "ಧರ್ಮಾವಿರುದ್ಧೋ ಭೂತೇಷು ಕಾಮೋಽಸ್ಮಿ" (ಜೀವಿಗಳಲ್ಲಿ ಧರ್ಮಕ್ಕೆ ವಿರೋಧವಲ್ಲದ ಕಾಮವು ನಾನೇ ಆಗಿದ್ದೇನೆ) ಎಂದು ಹೇಳಿದ್ದಾನೆ.

~ಲೇಖಕರು

ಶ್ರೀ ಎಸ್.ಶ್ಯಾಮಸುಂದರ ಘನಪಾಠೀ

ಶ್ರೀಶ್ರುತಿಪರಂಪರಾ ಗುರುಕುಲಮ್

ಬೆಂಗಳೂರು